मराठी भाषा ही आपल्याला स्वातंत्र्याची समज देणारी भाषा आहे. त्यामुळे ती समृद्ध करण्यासाठी आपण प्रत्येकाने मराठीमय वातावरण तयार केले पाहिजे. ती ज्ञानभाषा होण्याची क्षमता तिच्यात निश्चितच आहे असे मत गझलकार कमलाकर देसले यांनी व्यक्त केले.
मराठीतील प्रसिद्ध कवी कुसुमाग्रज यांचा २७ फेब्रु. हा जन्मदिवस मराठी भाषा गौरव दिन म्हणून साजरा केला जातो. त्यानिमित्त मू.जे. महाविद्यालयातील मराठी विभागाच्या वतीने आयोजित केलेल्या कार्यक्रमात प्रमुख अतिथी म्हणून ते बोलत होते. भाषेचा सत्ताधीश जग हलवू शकतो. त्यामुळे भाषा अत्यंत महत्वाची ठरते. परंतु कोणतीही भाषा जगवण्याचा प्रयत्न प्रत्येकाने केला पाहिजे. कारण कोणत्याही भाषेचा मृत्यू आपल्या अस्तित्वाला संपवत असतो. यावेळी त्यांनी त्यांची ‘आई तू शिकायला पाहिजे’ ही कविता आणि गझल आणि शेर रसिकांना ऐकविले. यावेळी त्यांनी ज्ञानेश्वर- तुकाराम-एकनाथ यांनी मराठी भाषेचे सांगितलेले महत्व सांगितले.
यावेळी महाविद्यालयातील मराठी विभागातील विद्यार्थ्यांनी ‘मी मराठी’ या गीतावर बहारदार नृत्य सादर केले. तसेच ‘महाराष्ट्राची लोकधारातील’ घनश्याम सुंदरा-शेतकरी गीत- जोगवा-माय मराठी या काही गाण्यांवर नृत्य यावेळी विद्यार्थ्यांनी सादर केली.
महाविद्यालयातील रत्नाकर कोळी याने ‘गाभारा’, विशाखा आंधळे व शर्मिष्ठा देवरे यांनी ‘आगगाडी व जमीन, पियुष तोडकर याने ‘स्वातंत्र्यदेवतेची विनवणी’ या कुसुमाग्रजांच्या कविता सादर केल्या. हे वर्ष प्रसिद्ध मराठी कादंबरीकार गो.नी.दांडेकर यांचे जन्मशताब्दी वर्ष आहे. त्यानिमित्त त्यांच्या साहित्यावर विद्यार्थ्यांनी लिहिलेल्या ‘कुणा एकाची भ्रमणगाथा: गोनीदा वाड्मय परिचय या परिचयात्मक आणि समीक्षात्मक लेखांच्या हस्तलिखिताचे प्रकाशन कमलाकर देसले यांच्या हस्ते करण्यात आले.
कार्यक्रमाच्या अध्यक्षस्थानी महाविद्यालयाचे प्राचार्य डॉ. उदय कुलकर्णी होते. यावेळी बोलतांना त्यांनी कुसुमाग्रजांच्या पुस्तकांची पारायणे केली पाहिजे असे मत व्यक्त केले. मराठी भाषा ही आपली मायबोली आहे. इंग्रजीचा वापर जरूर करा. परंतु मराठी भाषेला विसरू नका. तिच्यातून आपली संस्कृती पाझरते असेही ते म्हणाले. उपप्राचार्य प्रा.एन.व्ही.भारंबे व्यासपीठावर उपस्थित होते.
मराठी विभागाच्या वतीने महाविद्यालयातील मुख्य इमारतीत कुसुमाग्रजांच्या निवडक आणि लोकप्रिय कवितांची प्रदर्शनी लावण्यात आली होती. प्रास्ताविक मराठी विभागप्रमुख डॉ. विद्या पाटील यांनी केले. कार्यक्रमाचे सूत्रसंचालन व आभारप्रदर्शन प्रा. योगेश महाले यांनी केले. कार्यक्रमाच्या यशस्वीतेसाठी मराठी विभागातील प्रा. चारुता गोखले, प्रा. गणेश सूर्यवंशी, प्रा. हेमलता सोनावणे यांचे सहकार्य लाभले. कार्यक्रमाला महाविद्यालयातील प्राध्यापक व विद्यार्थी मोठ्या संख्येने उपस्थित होते.
Photo caption: (Press१) हस्तलिखिताचे प्रकाशन करतांना कमलाकर देसले, प्राचार्य व इतर
